«Калі б моц турэмных муроў залежыла ад колькасці людзей, што жадаюць абняць Алеся на волі, то яны б даўно рухнулі»

25 верасня Алесь Бяляцкі адзначае дзень народзінаў. Лідару праваабарончага цэнтра «Вясна» спаўняецца 62 гады.

Менавіта адстойваючы правы чалавека, Бяляцкі стаў палітзняволеным на сваёй радзіме і лаўрэатам Нобелеўскай прэміі.

З ліпеня 2021 года праваабаронца знаходзіцца за кратамі, дзе сустракае дзень народзінаў ужо ў сёмы раз.

За сваю праваабарончую і грамадскую дзейнасць Бяляцкі быў вязнем сумлення з 2011 па 2014 год. Зараз рэжым Лукашэнкі прысудзіў яму 10 гадоў пазбаўлення волі.

— Калі б моц турэмных муроў залежала ад колькасці людзей, што жадаюць абняць Алеся на волі, то яны б даўно рухнулі, — напісаў Анатоль Лябедзька і пажадаў Алесю Бяляцкаму «толькі адно — свабоды ў вольнай еўрапейскай Беларусі!».

— Рэжым кінуў яго за краты толькі за тое, што Бяляцкі пісаў праўду, фіксаваў рэпрэсіі і дапамагаў тым, каго яны закранулі, — напісала Святлана Ціханоўская. — Дзякуючы яго працы свет ведаў праўду пра стан рэчаў у краіне.

Нават за час нашага асабістага – хоць і вельмі кароткага – знаёмства я адчула яго бязмежную любоў да Беларусі. Любоў, якая, падаецца, натхняла ўсіх, з кім Алесь сустракаўся на сваім шляху. Ён здолеў падтрымаць і мяне, калі гэта было так неабходна. І хоць знаёміцца з Алесем бліжэй мне давялося ўжо праз гісторыі яго калегаў і людзей, якія мелі гонар добра яго ведаць, я ўпэўненая – абавязкова настане момант, калі мы сустрэнемся зноў. 

Бяляцкі стаў другім лаўрэатам Нобелеўскай прэміі з Еўропы, хто атрымаў яе, знаходзячыся за кратамі. Першым быў Карл фон Асецкі ў 1935 годзе, які быў ворагам нацысцкай Германіі.

Зараз інфармацыі пра Алеся Бяляцкага вельмі мала. Яго сябры і паплечнікі ў дзень народзінаў будуць зноў ладзіць акцыі салідарнасці, каб нагадаць, што ў цэнтры Еўропы ў 2024 годзе за свае перакананні і абарону правоў чалавека ў жахлівых умовах калоніі знаходзіцца лаўрэат Нобелеўскай прэміі.

Далучыцца да акцый можна а 14-й у Вільні (Naugarduko, 7) і ў 18 гадзін у Варшаве (Plac Konstytucji, каля будынку Plac Konstytucji, 6).

Калектыў «Салідарнасці» таксама жадае паважанаму спадару Алесю моцы і здароўя, і як мага хутчэй апынуцца на волі ў роднай краіне.