Святлана Ціханоўская атрымала ўзнагароду «Еўрапеец года»

Гэтая ўзнагарода штогод прысуджаецца асобам, якія ўнеслі выбітны ўклад у еўрапейскую інтэграцыю, развіццё еўрапейскага грамадства і прасоўванне агульначалавечых каштоўнасцяў.

Пераможцы прадстаўляюць розныя сферы дзейнасці – палітыку, культуру, навуку альбо спорт. Раней еўрапейцамі года прызнаваліся, напрыклад, Уладзімір Зяленскі, Эмануэль Макрон, прэм'ер-міністарка Даніі Метэ Фрэдрыксен.

Прэс-служба палітыка цытуе найбольш моцныя моманты лаўрэацкай прамовы, якую Святлана Ціханоўская рабіла ў нацыянальным музеі Даніі:

— Толькі ў Еўропе Беларусь зможа квітнець і цалкам рэалізаваць свой патэнцыял. Толькі ў Еўропе Беларусь зможа захаваць незалежнасць і  пабудаваць дэмакратычныя інстытуты, якія будуць служыць народу, а не ўзурпатарам.

— Мы, беларусы, можам унесці свой уклад у развіццё Еўропы. З нашай унікальнай культурай, выдатным геаграфічным становішчам, адкрытым і працавітым народам. Я ўпэўненая, што еўрапейскі праект ніколі не будзе поўным без вольнай Беларусі і без суверэннай Украіны.

— Нашая музыка і літаратура, нашае мастацтва і гісторыя кажуць пра тое, што Беларусь належыць да еўрапейскай сям'і, а не знаходзіцца па-за ёй. На працягу стагоддзяў мы былі часткай еўрапейскай супольнасці.